Rebeca Dautremer: Forelska
Ei biletbok frå Skald 2010, omsett frå fransk av Tove Bakke.

Mest for barn, men heller inga dårleg kjærleiksgåve til vaksne.

Olav likar å plage jentene i barnehagen, særleg Simone, som sladrar til mor si. Mor til Simone trur Olav ter seg så slemt fordi han eigentleg vil leike med Simone – kan hende er han til og med litt forelska? Resten av boka er utforma som ein dialog mellom barna i barnehagen der dei diskuterer kva det vil seie å vere forelska. Det er kosteleg å få eit abstrakte omgrep ned på eit så konkret plan. Kan forelska vere å falle pladask? Boka spør meir enn ho svarar, og byr barn på mykje å tenkje på, medan vaksne høgtlesarar får mykje å more seg over.

Kristoffer sa at forelska, det er inni hjartet.
- Så ein blir kvalm?
- Og har feber?
- Og er slapp?
- Sjuk, altså?

Så godt fungerer denne dialogen at boka finst dramatisert som eit lite skodespel i Frankrike.

Dette er første boka av franske Dautremer på norsk. Mange av biletbøkene ho har illustrert for barn, er slike vaksne kunstelskarar gjerne kjøper til seg sjølv. Som regel overlét ho til andre å skrive teksten, men ikkje her. I omsetjinga til Tove Bakke framstår ho jamvel som ein god tekstforfattar. Dermed har ho kunna forme heilskapen nett slik ho sjølv vil, i ein spenstig komposisjon der orda smyg seg fint inn i bileta. For denne eventyrspesialisten blir sjølv ein barnehage ei magisk verd stemningsfullt måla i nyansar av raudt. Illustrasjonene testar ut tankane heilt konkret, til dømes der barna fell pladask gjennom lufta.

Barna i Dautremers muntre eventyrpoesi gir meg assosiasjonar til eventyrfigurane til Ivo Caprino og kan minne litt om marionettar. Lange trådar viklar figurar inn i kvarandre og kan få ein til å tenkje at forelsking meir er noko ein er offer for enn noko ein sjølv rår over. Likevel får Dautremer forelsking til å framstå som ein forunderleg fest. Innleiingsvis var eg redd dette skulle vere ei bok som unnskylder vald frå smågutar, men til slutt – etter alle forslaga til definisjon – er det opp til lesarane om dei vil oppfatte Olav som forelska eller berre slem. Eg kan godt forstå at bibliotekarane i Frankrike kåra dette til beste biletbok i 2003.

GURI FJELDBERG

tilbake

Alt materiale på denne siden er beskyttet av åndsverksloven.

Tegning: Jan-Kåre Øien Foto: Ingebjørg Jensen